എല്ലാ കണ്ണുകളും ഗില്ലില്‍

ലോക ടെസ്റ്റ് ചാമ്പ്യൻഷിപ്പ് ഫൈനലിന് തുടക്കമാവുമ്പോൾ എല്ലാ കണ്ണുകളും യുവതാരം ശുഭ്മാൻ ഗില്ലിലേക്കാണ്. ഐപിഎല്ലിലെ തകർപ്പൻ പ്രകടനത്തോടെയാണ് ഗിൽ ഇംഗ്ലണ്ടിൽ എത്തിയിരിക്കുന്നത്.

ഐപിഎല്ലിന്‍റെ താരമായിരുന്നു ശുഭ്മാൻ ഗിൽ. 17 കളിയിൽ ഗുജറാത്ത് ടൈറ്റൻസ് ഓപ്പണർ നേടിയത് മൂന്ന് സെഞ്ച്വറിയും നാല് അർധസെഞ്ച്വറിയും ഉൾപ്പടെ 890 റൺസ്.

ടോപ് സ്കോറർക്കുള്ള ഓറഞ്ച് ക്യാപ് സ്വന്തമാക്കിയ ഗിൽ മോസ്റ്റ് വാല്യുബിൾ പ്ലെയറായും തെരഞ്ഞെടുക്കപ്പെട്ടു.

വൈറ്റ്ബോളിൽ നിന്ന് റെഡ് ബോളിലേക്കുള്ള മാറ്റമാണ് ഗില്ലിന് മുന്നിലെ പ്രധാന വെല്ലുവിളി.

തകർപ്പൻ ഫോമിൽ കളിക്കുന്ന ഗില്ലിന് പാറ്റ് കമ്മിൻസും മിച്ചൽ സ്റ്റാർക്കും സ്കോട് ബോളണ്ടും ഉൾപ്പെടുന്ന ഓസീസ് പേസ് നിരയെ അതിജീവിക്കാനാവുമെന്നാണ് ഇന്ത്യൻ ക്യാമ്പിന്‍റെ പ്രതീക്ഷ.

പതിനഞ്ച് ടെസ്റ്റിൽ കളിച്ചിട്ടുള്ള ഗിൽ രണ്ട് സെഞ്ച്വറിയും നാല് അർധസെഞ്ച്വറിയും ഉൾപ്പടെ നേടിയത് 890 റൺസ്.

ഇന്ത്യയിൽ കളിച്ച എട്ട് ടെസ്റ്റിൽ 417 റൺസും വിദേശത്തെ ഏഴ് ടെസ്റ്റിൽ 473 റൺസും.

ഇന്ത്യയിലും വിദേശത്തും ഓരോ സെഞ്ച്വറിയും രണ്ട് അ‍ർധ സെഞ്ച്വറിയും. ഓസ്ട്രേലിയക്കെതിരെ അഹമ്മദാബാദിൽ നേടിയ 128 റൺസാണ് ഉയർന്ന സ്കോ‌ർ.

കോലിയുടെ പിൻഗാമിയാകാൻ ഒരുങ്ങുന്ന ഗില്ലിന്‍റെ കരിയറിലെ ഏറ്റവും വലിയ പരീക്ഷണത്തിനാണ് ഓവൽ വേദിയാവുക.